葡萄牙知識 - 想實現願望就食提子乾

葡國除夕倒數：想實現願望就食提子乾！

2020年，相信對於每個地球人嚟講都係特別嘅一年，既然咁特別，咁我哋一於用特別嘅方式送別佢。其實我哋講緊嘅係體驗葡國人嘅除夕倒數活動：食提子乾！

葡萄牙有個傳統，就係喺跨年鐘聲響嘅時候要食 12 粒提子乾，一下鐘聲要食一粒，一粒提子乾可以為來年其中一個月許一個願望，直至12下鐘聲響完為止。然後大家就會互相擁抱，開支香檳慶祝，齊齊踏入新一年。

其實講就容易，因為大家要跟住最後12下鐘聲，一秒一秒將提子乾放入口唔係一件容易嘅事，所以好多人都會跟唔切節奏，變相最後一次過將食唔切嘅提子乾倒入口😊，過程中仲會好容易唔記得許願！大家可以想像一下成個過程都幾搞笑架。

其實有幾個講法：

跨年食提子乾與提子嘅產季有關。提子收成期一般喺八至十月。所以，到咗聖誕同新年就會有一大批新曬提子乾上市啦。
同葡文有關，提子乾葡文叫passa，佢同葡文動詞“度過/經過（passar）”嘅現在式第三人稱單數變位一樣，所以好多葡國人都會將“提子乾（passa）”同跨年（passagem de ano）聯繫起來，寓意辭舊迎新。
從宗教角度嚟睇，有人認為提子乾同耶穌有關。因為葡萄酒喺天主教嘅傳統入面成日被象徵著耶穌嘅血。而提子乾有時候亦會被當成葡萄酒嘅替代品，所以提子乾好自然地聯繫到耶穌。
最後呢個係葡國最流傳嘅講法，話說呢個食提子乾嘅傳統係源於19世紀末嘅馬德里。當時其實西班牙人係無慶祝除夕嘅習慣，因為佢哋習慣慶祝1月6日嘅賢士節（ReisMagos）。相反，當時嘅法國人同德國人係會慶祝除夕，而且仲會喺除夕嘅時候食提子。但突然馬德里市議會宣佈要徵收市政稅，而且仲要西班牙人好似德國人、法國人一樣，喺1月1日嘅時候舉行慶祝活動，如果唔遵守新規定嘅人就要被罰款。於是，西班牙人喺12月31日開始喺Praçado Sol聚集抗議，他們唔食新鮮提子而改食提子乾。慢慢，呢個慣例變成咗一種傳統，仲傳到去葡萄牙添。