葡萄牙知識 - 葡國食物銀行

葡國食物銀行

葡國食物銀行（Banco Alimentar）主要係一間負責處理捐款用途、存放捐贈食物同埋分發物資比已登記機構嘅組織。佢哋嘅目的係希望社會上嘅食物能夠更公平地被分配，減少食物浪費嘅同時，亦希望幫助到貧窮飢餓嘅家庭、長者或新移民得到更多食物。

葡國食物銀行其中一個主要部門就係物流公司，佢哋要負責收集、運送、分類同貯存食物。不過，咁龐大嘅活動一定需要好多人力物力。所以，其實佢哋一年兩次嘅收集食物活動都會邀請大量義工架。如果你係葡國嘅學生，其實都好容易成為學生義工，因為好多大、中、小學都會係校內幫食物銀行招募義工，再加上葡國童軍同埋一啲慈善機構人員嘅出動，收集食物呢個活動絕對唔成問題啊。

不過咁，唔通係我哋自己攞啲食物比佢哋？其實成件事好簡單架炸，喺葡國，因為大多數家庭都只會喺週末去超級市場入場，一買就係一個星期嘅食物，好多媽媽都會手上拎著一張手寫嘅購物清單，爸爸就負責推車，小朋友就負責跪求買零食，所以葡國食物銀行就趁著呢個機會係超級市場門口派發特製嘅袋，希望葡國人入去超市買日用品嘅時候都可以買少少食物比有需要嘅人。

紙袋背面會印著啲建議購買嘅食物，主要係可以保存耐少少嘅食材，例如：牛奶、橄欖油、油、糖、餅乾、豆類、麵、麥片、米、麵粉等。除咗呢啲食物，你都可以因應時節揀禮物放落個袋到，例如，喺聖誕節前夕，食物銀行一定會進行一次食物收集活動，好多葡國人都會買少少禮物或朱古力送比食物銀行，只要我哋喺收銀處埋完單之後，就會見到大量義工係門外接收消費者捐贈嘅物資，然後再運返中心做後續工作。