葡萄牙知識 - 仲有日本名物係黎自葡萄牙？

仲有日本名物係黎自葡國？

除咗長崎名物長崎蛋糕唔係黎自長崎之外，原來連京都名物都唔係黎自京都架！喱樣係乜？就係金平糖啦！

金平糖，日文：金平糖（こんぺいとう），葡文：confeito，中文：金平糖。一粒外型似星星嘅糖，一粒由蔗糖糖漿逐漸包住結晶核心形成嘅球狀結晶，呢隻糖平平無奇，見到都唔知佢有名。

金平糖嘅由來係點？

話說戈陣仲係戰國時代嘅1546年，由葡萄牙傳教士傳入日本，但當時仲未興起金平糖喱個甜品，直到1569年有個葡萄牙傳教士路易斯·弗洛伊斯去京都二條城拜見織田信長戈陣帶埋金平糖過去，織田信長對金平糖嘅形狀同埋味道感到驚訝，十分好評。慢慢咁，金平糖就喺京都流傳同埋製作，逐漸咁變咗係京都名物啦！但當時因爲糖仲係好珍稀嘅物資，同埋個製作方法都係好神秘，所以只會係封建領主貢獻俾天皇嘅貢品。

喺1637年根據長崎甲比丹商館館長嘅日記曾經記載過，喺葡萄牙商船上搬運各種金平糖有成3000斤，並且運到京都等唔同嘅地方賣，或者就將金平糖作為貢品上貢俾天皇。

直到喺1688年井原西鶴出版咗《日本永代藏》，入面紀錄咗長崎成功製作到金平糖，同埋仲好詳細咁介紹長崎金平糖嘅做法。

去到18世紀，金平糖嘅製作方法已經喺庶民階級到傳開晒，成為咗街知巷聞嘅菓子！

咁金平糖會係點整？

金平糖最古老嘅材料只係得粗糯米粉同糖，睇落好似好簡單咁，但其實做法好複雜。首先要準備一個可以傾斜嘅巨大銅鍋，糯米粉做核心，然後慢慢不停咁轉個鍋，不停轉動嘅同時一邊加入砂糖，等砂糖逐漸在表面結晶形成星型外殼。整個製作過程要花上大約兩個星期時間，就咁樣啲砂糖慢慢咁結晶，慢慢咁長大，由一開頭1cm都無慢慢變到成品嘅大細。製作戈陣仲會受到氣溫、濕度、鍋嘅角度等不確定因素影響。所以必須要隨時注意溫度、濕度、鍋嘅角度同埋糖嘅份量，配合著自身嘅經驗黎進行微妙嘅調整。

由於製作過程太麻煩，所以依加金平糖已經無乜係人手整，慢慢變晒做機器整。並且除咗有唔同水果口味嘅金平糖之外，還出現咗加入高級紅酒、甜白酒等材料的金平糖。