葡萄牙文化知識 - 葡葡 vs 巴葡 I

葡葡 vs 巴葡

唔知大家知唔知葡文其實有兩大派別呢？佢地分別係葡萄牙葡文同埋巴西葡文，我地同大家講下佢地嘅由來同分別～啦！

喺澳門，街上嘅政府海報除咗有中文之外，仲會有葡文，唔知大家又知唔知澳門係用緊咩葡文呢？我地一齊睇下澳門係用咩葡文同埋睇下葡文點解會分兩大派別啦！

葡文好似喺全球唔係好流行？

唔講可能唔知，一講可能嚇親你哋，葡文是全球第7大使用量嘅語言，世界大約有兩億七千五百萬嘅人講緊葡文，其中兩億五千萬嘅人係用葡文作為佢哋嘅母語，另外兩千五百萬人當葡文係第二語言。

講葡文嘅人除咗係葡國人之外，其他主要嚟自葡國以前嘅殖民地，例如：巴西(Brasil)、佛得角(Cabo Verde)、安哥拉(Angola)、莫桑比克(Moçambique)等等。

點解巴西會講葡文？

喺15世紀中期，葡萄牙航海大時代 (Descobrimento)開始嘅時候首先發現咗大西洋上兩個群島：馬德拉群島(Madeira)、亞速爾群島(Açores)。呢兩個群島到依家都係隸屬葡國。

1498年，葡國航海家達伽瑪(Vasco da Gama )成功繞過非洲好望角(Cabo da Boa Esperança)，成為第一個成功抵達印度嘅歐洲人。

兩年後，另一位葡國航海家卡布拉爾(Pedro Álvares Cabral)以為可以喺葡國西邊前往印度，但好彩錯有錯著，比佢發現咗位於南美洲嘅巴西，成為第一個踏上巴西土地嘅歐洲人。

從此，葡萄牙就打開咗歐洲航海時代嘅大門啦。

當時，葡國人一心想將巴西打造成農園，所以運咗好多位於非洲殖民地嘅奴隸過去幫手。後來亦有好多葡國人移居巴西，加上巴西受到其他美洲國家文化嘅影響，所以巴西嘅葡文發音同葡萄牙本土嘅葡文發音越來越大分別。

今日就講住咁多先啦！下次我地一齊聽下佢地嘅分別啦！想知更多？記得留意我地Facebook/IG 啦！Chau chau~~