澳葡文化知識 - 澳門堂區

喺好耐好耐以前，大約喺3世紀末至4世紀初嘅時候，葡國已經出現咗堂區劃分嘅雛形。1139年，葡萄牙王國成立後，宗教堂區（paróquia）嘅數量開始增加，堂區組織喺社區生活上越來越普遍，無論係宗教、文化定係教育事務都開始圍繞著堂區嚟進行。

不過，呢段時間嘅堂區組織喺本質上仍然係宗教堂區（paróquia），仲未成為葡國行政建制嘅一部分。

後來，到咗1830年，宗教堂區（paróquia）成立委員會（juntas de paróquia），除咗負責宗教事務，仲有權力處理地方事務。再喺1835年，宗教堂區（paróquia）被正式納入葡國地方行政劃分嘅一部分。

堂區改名：paróquia > paróquia civil

1867年行政改革開展，宗教堂區（paróquia）被正名為“行政堂區”（paróquia civil），負責管理居民集體利益同教會財產。

堂區再改名：paróquia civil > freguesia

又又又再喺1910年葡萄牙共和國成立之後，“行政堂區” 嘅葡文名“paróquia civil” 再被改名為“freguesia”。

簡單嚟講，葡國嘅堂區本身就係天主教嘅傳教分區，一開始係無任何地方政府行政權力。但後來，因為各個堂區嘅活動同生活息息相關，所以這種傳統喺葡國憲制上被確立咗，成為葡國絕大部分地區嘅基層政權單位。而其葡文名稱亦由“paróquia”（宗教堂區）演變為“freguesia”（行政堂區） 。