澳葡文化知識 - 澳門街道中文名點黎？

以前澳門係葡萄牙嘅殖民地就係人都知啦，不過澳門嘅街道中文名同葡文都好有關係你又知唔知？ 

今日，等我哋一齊黎個澳門街道遊啦！

戀愛巷

鼎鼎大名嘅戀愛巷可能唔係大家想像中咁浪漫？ 

我地來對照一下澳門戀愛巷同佢嘅葡文：Travessa da Paixão，Paixão中文可以解愛慕、熱戀嘅意思，但亦都可以譯作受難，而Travessa解巷。呢條巷名嘅由來好大機會同隔離嘅大三巴同埋耶穌受難故事有關。所以呢條巷譯作“受難巷”可能更加貼切。

不過，當時澳葡政府就選擇咗用一個更加浪漫嘅翻譯，將葡文Travessa da Paixão譯作戀愛巷。時至今日，戀愛巷已經吸引咗好多人慕名而來，睇黎呢個葡語譯名真係一個非常好嘅選擇呀!

既然戀愛巷嘅葡文有咁多中文意思，咁即係無論係拍緊拖嘅情侶定係失戀嘅朋友都可以去到戀愛巷表達一下你哋嘅情緒啦？

十月初五街

十月初五街同中國農曆無關？

我地黎睇一睇十月初五街個葡文：Rua de Cinco de Outubro，Rua 係中文解街道，而Cinco de Outubro 就係十月五號的意思。

其實十月初五係會聯想到1910年10月嘅葡萄牙革命，當時葡萄牙推翻咗君主制度，成立共和政府。澳葡政府為咗紀念革命成功，就將原名為泗口孟街改名為十月初五街。“初五”係指“十月第五日”，而唔係中國嘅農曆初五。所以大家唔好再會錯意啦。

唔講唔知，喺二十世紀初期澳門十月初五街其實係非常之繁華架，當時有好多商人會聚集喺呢到做下生意，再飲杯茶食個包，人流分分鐘勁過依家旺季嘅大三巴呀！如果大家週末唔知去邊，其實去舊區打個卡都係一個唔錯嘅選擇喎。