葡萄牙小知識 - 賈梅士去過白鴿巢公園？

6月10號對葡國黎講係一個重要嘅日子，因為會慶祝三件事情：葡萄牙日、賈梅士日暨葡僑日（Dia de Portugal, de Camões e das Comunidades Portuguesas）。我地而家一齊來睇睇究竟係咩黎啦！

葡萄牙日：
6月10日係葡國嘅國慶，用今日作為葡國國慶主要係因為葡國偉大詩人-賈梅士（Camões ）嘅忌日，呢個名聽就聽得多啦，咁究竟佢係邊個？

賈梅士日：
賈梅士（Camões）（1524-1580）係葡國嘅一位偉大詩人。佢創作嘅史詩《葡國魂》（Os Lusíadas）係葡萄牙文學中最重要嘅作品之一，記載咗葡國航海時期嘅英偉事蹟，歌頌葡國民族熱愛冒險、崇尚自由嘅偉大精神。

賈梅士詩人嘅著作可以話係葡國人嘅精神支柱，而佢嘅祭日更加被欽定為葡國國慶日。相傳詩人賈梅士係白鴿巢公園石洞內完成著作《葡國魂》（Os Lusíadas），所以今日朝早會有葡文學校同葡文社團去到白鴿巢公園石洞獻花同朗誦賈梅士嘅詩作。

葡僑日：
因為詩人賈梅士係葡國航海大發現嘅象徵人物，所以呢日就成為世界各地嘅葡國僑民用黎表達遍布世界嘅殖民地、擁有共同種族和語言的歸屬感嘅一種表現方式。

咁以後大家要記住6月10日對葡國黎講係幾咁重要啦！

圖片及資料來源：https://www.vortexmag.net/porque-razao-o-dia-de-portugal-se-celebra-a-10-de-junho/