葡萄牙小知識 - 歐洲歌唱大賽(Eurovision)

相信無論中唔中意唱歌嘅朋友都會中意睇音樂比賽節目，今日就同大家分享一個名為歐洲歌唱大賽（Festival Eurovisão da Canção / Eurovision Song Contest）嘅活動。呢個節目係目前歐洲規模最大、最壯觀嘅音樂比賽。

比賽早於1956年就由歐洲廣播聯盟（EBU）主辦，目的係為咗舉辦一個可以令EBU成員國聚埋一齊嘅娛樂活動。第一屆歐洲歌唱大賽喺瑞士舉行，只有七個國家參加，係唯一一屆每個國家表演兩首歌曲嘅比賽，其後每屆大賽只可以每個國家演唱一首歌曲。所演唱嘅歌曲無語言限制，但一定係創作歌曲，唔可以係翻唱其他歌手嘅作品。