葡萄牙文化 - 葡萄牙習俗與禁忌

吓？！喺葡國提早講生日快樂都唔得？

始終每個地方都有自己嘅文化傳統，咁葡萄牙又有咩習俗同禁忌大家要注意？不如一齊嚟睇睇啦！

1. 生日絕對唔可以提前過？

葡國同中國嘅習俗完全唔同架，中國人認為生日可以提早過而唔可以過咗先過生日，而葡國人就絕絕唔會提早慶祝生日架，因為佢哋認為生日呢一日仲未到，如果講咗生日快樂就會引至不幸嘅事情發生，係完全被認為會有厄運降臨，所以大家記住忍口啊！當然，補祝生日係完全無問題嘅。

2. 收到禮物要即場拆開？

細細個嘅時候學校同屋企都教導我哋收到禮物除咗要講多謝之外，仲要唔可以即刻拆開禮物，因為咁樣做會令人覺得自己無禮貌同埋好似好貪心，所以我哋多數都係返到屋企先會拆禮物。不過，如果大家喺葡國收到禮物嘅時候記得要做相反動作啊，因為喺葡國要即刻喺人哋面前拆禮物先表示禮貌，如果無拆開嘅話就代表唔鍾意甚至嫌棄份禮物架。

3. 見面要鍚鍚？

歐洲人不嬲都出名熱情開朗，所以身處喺陽光普照地區嘅葡國人當然都唔例外啦！法國人見面嗰陣要鍚面頰相信大家都唔陌生，但其實喺葡國都有呢個習俗架。當葡國人碰面或者聚會嘅時候，無論係朋友定係仲未認識嘅人都會互相鍚面，但男仔同男仔就只會互相握手，唔會鍚鍚嗱。試想像一下有10個人約去餐廳食飯，每個人入黎餐廳之後就要逐個打招呼同鍚面，當第10個人入到餐廳嘅時候，呢個人就要同面前嘅9個朋友逐一打招呼同鍚面，然後大家再傾吓計先會點嘢食。等大家食飽飽離開餐廳嘅時候，當然又要再一次逐個道別同鍚面啦，正所謂禮多人不怪呀嘛，所以計返前後鍚面同食飯傾計嘅時間，葡國人食一餐飯都可以食三個鐘架。

4. 葡國商鋪中午唔開門？

葡萄牙係一個休閒國家，慢活係葡國人喜好嘅生活方式，所以好多唔喺旅遊區嘅鋪頭中午都會休息2、3個鐘，然後下午再開門至6、7點就會閂門。尤其係一啲麵包店、士多同埋洗衫店，佢哋嘅營業時間通常都比較短，所以大家最好喺朝早或者下午先去買嘢啊。又不過，其實葡國嘅超級市場係長年無休架，呢樣嘢係葡國同其他西方國家唔同嘅地方。

5. 問葡國人收入問題會好尷尬？

喺澳門，當有家人朋友揾到一份工嘅時候大家通常都會問吓對方工作嘅福利薪酬，講完問完可能仲會互相比較薪酬高低或者吐吓苦水，除非有一方介意，如果唔係其實呢個話題都係我哋生活嘅一部分。不過，葡國人其實唔係咁諗架，因為佢哋生活比較獨立自主，唔中意有其他人過問太多自己嘅私人問題，特別係經濟收入呢方面嘅問題可能連屋企人都唔知架。