澳葡文化知識 - 澳式葡文

澳式葡文(Português de Macau)係咩嚟？

澳式葡文就係葡萄牙葡文加上澳門廣東話結合而成嘅獨特語言。澳式葡文喺發音、文法方面同歐洲葡語基本上一樣，但由於澳門有啲地區嘅葡文名字是從廣東話發音拉丁化過黎嘅，而葡文入面又無喱個發音，所以就出現獨特嘅「葡文拼法，英語讀法」。

咁澳式葡文即係土生葡語？

梗係唔係啦，佢地係兩回事黎架。土生葡語係澳門土生葡人嘅日常溝通語言，土生葡語以葡文做基底，再混合唔同地區嘅詞彙演變出黎嘅一種新語言。

咁澳式葡文係點樣架？

澳式葡文同葡萄牙葡文其實都差唔多，分別只係將一啲澳門慣用嘅粵語發音變成葡文拼音字，仲有就係澳門一直都沿用舊式葡文，令葡文喺澳門變得更生活化。

例如有啲澳門中文地方名嘅發音喺葡文發音系統係唔存在，咁呢啲地方嘅葡文發音唯有揾個近似音寫出黎，咁就發明咗澳式葡文啦！

唔知當大家去黑沙燒烤嘅時候有冇留意過黑沙海灘嘅葡文名點寫同點讀？

黑沙海灘嘅葡文係Praia de Hac Sá，praia係海灘嘅意思，Hac Sá呢個葡文字就係利用中文嘅發音譯成葡文拼音，喺我哋平時學嘅葡文入面係無呢個字架。

澳式葡文仲有另一個特色，就係只有澳門先會用嘅詞彙，例如：熟食中心嘅澳式葡文係Centro de Comidas，停車場嘅澳式葡文係Auto-Silo。

澳門葡文同葡萄牙葡文仲有咩唔同？

雖然大家都知道澳門嘅官方語言係中文同葡文，不過喺寫法上，澳門嘅官方葡文同依家葡國用緊嘅葡文或者其他國家嘅葡文係有少少唔同架！原因係因為澳門無簽到一九九零年葡語書寫協議(Novo Acordo Ortográfico da Língua Portuguesa de 1990)，呢份協議係統一咗葡文詞彙嘅寫法，令到葡語系國家嘅人可以更方便去交流。

喺新版葡文入面，好多有字母c嘅生字都改成無c，例如：

舊式拼法	新式拼法	中文
contacto	contato	接觸、聯絡
direcção	direção	方向
eléctrico	elétrico	電車
electricidade	eletricidade	電力

澳門電力股份有限公司嘅葡文寫法就係用緊舊式拼法：Companhia de Electricidade de Macau – CEM, S.A.

所以澳門嘅文書或者法律文件都繼續使用舊式葡文拼法。

換然之我哋喺澳門學葡文都係舊式拼法？

咁又唔係喎！因為喺澳門教葡文嘅機構大多都會採用葡國嘅教材，依家葡國出版嘅葡語教科書或者葡文書籍都會使用1990年葡語書寫協議的拼寫，所以我哋學到嘅葡文都係新嘅拼寫規則囉。而我地本新教材亦都係採用新式拼寫黎編輯架！同時亦都符合歐洲語言共同參考框架(QECR)，同學讀完就有能力去考國際葡語能力試(CAPLE)架啦！

平時大家嚟學完葡文，記得要留意街外面嘅拼寫有冇咩唔同啊，有嘅話記得留言話返比我哋知哦！Bom estudo (學習愉快) 啦各位！

查詢及詳情