葡萄牙小知識 - 葡國人中唔中意睇足球

葡國人同好多西方國家嘅人一樣都好熱愛足球，佢哋熱愛嘅程度可以話係深入骨子裡。例如每到足球賽季嘅時候，葡國首都里斯本都會上演好多場球賽，基本上每到週末總會有一場賽事。就算你唔係球迷都好，你都一定會知道當日有球賽。點解？因為葡國球迷係會喺中午時分就開始著住波衫去餐廳食飯、去商場行街或者直接徒步前往球場等待傍晚嘅球賽。只要你當日有出街，你就會知道有球賽，就算唔出街都會聽到樓下嘅歡呼聲。😂😂

講到睇波咁就當然要配啤酒同小食啦（注意：未成年人士請勿飲酒），不過喺葡國係會食豬扒包（bifana）睇波架，葡國嘅豬扒包好少用炸豬扒，多數係用醬汁煮熟嘅豬扒，咬落去有少少汁，唔太乾，大家去葡國嘅時候記得去試下呀！

除咗睇波嘅日子會講波，其實葡國人平時無論喺大學、工作地方定係屋企都會傾足球嘅話題。連送禮物都會諗起足球嘅周邊產品，街上亦會見到足球嘅塗鴉或字句，所以只要喺里斯本，足球就無形咁圍住你，同你形影不離，同我哋生活開嘅澳門真係好唔同架！

最後教大家叫一杯啤酒同埋一個豬扒包：

首先要學識呢兩個葡文生字：
啤酒：cerveja (n.f)
豬扒包：bifana (n.f)

跟住同之前叫咖啡嘅句型一樣，只要喺你想叫嘅食物前面講：

___Queria___ + _uma_+ ______________ + __por favor / faz favor__ .
（我想要…）+（一）+（啤酒/豬扒包）+（唔該）

例句：

1. Queria uma cerveja, por favor.
2. Queria uma bifana, faz favor.

大家去到葡國不妨都體驗下呢種足球文化啦⚽️！