葡萄牙文化知識 - 學完葡文就識西班牙文？-上

識葡文好威水？

喺亞洲，葡文通常都被視為小語種，學葡文嘅學生比學其他西方語言嘅少。不過，其實喺世界上係大約有2.4億人講緊葡文架，如果要按人數嚟排序，佢會喺中文、英文、俄文、西班牙文同印地文之後，即係全世界第六大語言啊！最緊要仲係澳門嘅官方語言之一，點都要學下啦。

好似唔夠勁？

如果我哋用常用語言嚟講呢，葡萄牙文係繼英文同西班牙文之後第三大常用世界語言！哇！係咪突然覺得自己好似同世界零距離呢！

葡文係由西班牙文演變出嚟？

因為西班牙國土面積大過葡萄牙好多，而且西班牙又曾經喺歷史上佔領過葡萄牙，再加上大家都比較認識西班牙，所以可能好多人都覺得葡萄牙係由西班牙分裂出嚟。

再講落去就得出葡文只係西班牙文嘅分支。

但係，呢個諗法係錯架！大家千其唔好咁諗啊！

如果我哋要認清葡文嘅身世，就首先要認識葡國嘅建國歷史。其實葡萄牙王國早喺1139年就成立，而當時西班牙仲未立國，要等到300幾年後嘅1492年西班牙先成立王國。所以葡萄牙係比西班牙早好多出世架。而葡文其實比佢個王國，葡萄牙王國更早出現，當時嘅古葡萄牙文(Galego-português)係伊比利亞半島上嘅一種方言。但當葡萄牙王國成立之後，佢就變成呢個王國嘅主要語言，而且慢慢成為葡萄牙人嘅獨有語言喇。

好啦，今日就講住咁多先啦，想知葡文同西班牙文係咪可以互通？咁大家記得留意我哋下一集啦！